Pampaganda Tips ni Dok

Liza Soberano photo

Maraming mga skin experts ang nagsasabing mapapaganda nila tayo. Ngunit kadalasan ay mahal ang ating gagastusin. Dahil dito, nagsaliksik ako ng mga simple at matipid na paraan para tayo’y gumanda.

1. Huwag magpa-araw – Alam kong marami sa ating kabataan ang mahilig magtungo sa beach, pero masisira ang kutis niyo diyan. Ang matinding sikat ng araw ay nagpapakulubot ng balat at posibleng magdulot ng skin cancer dahil sa UV light. Umiwas din sa mga sports na laging bilad sa araw. Magtago sa sikat ng araw mula 10 ng umaga hanggang 4 ng hapon.

2. Gumamit ng sunblock – Payo ng dermatologists ang paggamit ng sunblock araw-araw. Hanapin ang sunblock na may nakasulat na SPF 15 o 30 pataas. Bilang dagdag proteksyon, puwedeng mag-payong, mag-sombrero o magtakip ng folder sa mukha.

3. Umiwas sa usok at alikabok – Kapag nagbiyahe ka mula Pasay hanggang Fairview, naku, parang umitim ka na sa usok. Titigas ang iyong buhok sa alikabok. Kung may budget, mag-aircon bus na lang o magtakip ng mukha.

4. Ihinto ang paninigarilyo at pag-inom ng alak – Ang paninigarilyo ay nakatatanda sa ating mukha. Ang alak naman ay nagpapakulubot din ng balat. Hihina ang iyong resistensiya at babagsak ang iyong katawan.

5. Maligo araw-araw - Gumamit ng sabon at maraming tubig para tiyak na malinis ang katawan. Maganda ang mild soap tulad ng Johnsons at Dove soap. Mainam ding maligo bago matulog. Sa ganitong paraan, hindi kakalat ang dumi mula sa buhok papunta sa mukha na puwedeng magdulot ng tigyawat.

6. Uminom ng maraming tubig – Uminom ng 8 basong tubig araw-araw para manatiling malambot ang iyong balat. Nakakita ka na ba ng batang nakulangan sa tubig? Biglang lumulubog ang kanilang mukha.

7. Magbawas ng stress – Ang madaling magalit ay mabilis pumangit di ba? Nagsasalubong ang kilay at nakangiwi ang labi. Ngumiti ka at ika’y gaganda.

8. Matulog ng 7 o 8 oras – Kailangan mo ang sapat na tulog para hindi magka-eye bags. Sa mga may problema, subukan mag-relax bago matulog.

9. Huwag matulog ng nakadapa – Kapag naipit ang iyong mukha habang natutulog, madali itong magkakalinya. Matulog ng nakatihaya.

10. Mag-lotion sa gabi – May tulong sa pagpapakinis ng mukha ang paggamit ng lotion. Maghugas muna ng mukha bago maglagay ng lotion. Hindi naman kailangang bumili ng mamahaling brands.

11. Mag-ehersisyo at magkaroon ng libangan. Ang importante ay masaya tayo para sumigla ang katawan.

12. Kumain ng tama at masustansya - Kumain ng prutas at gulay na sagana sa vitamins at minerals. Umiwas sa pagkaing matataba, mamantika at sitsirya. 

Sundin ang mga simpleng payong ito para tayong lahat ay gumanda!

isinulat ni: Dr. Willie Ong